നഗരത്തെ തണുപ്പിച്ചുകൊണ്ട് പെയ്യുന്ന സായാഹ്ന മഴയ്ക്ക് എന്ത് ഭംഗിയാണെന്ന് രഞ്ജിത്ത് പലപ്പോഴും ചിന്തിക്കാറുണ്ട്. പതിനഞ്ചാം നിലയിലെ ഫ്ലാറ്റിന്റെ ബാൽക്കണിയിലിരുന്ന് ദൂരെയുള്ള കടൽത്തീരത്തേക്ക് നോക്കുമ്പോൾ മനസ്സിന് വല്ലാത്തൊരു ശാന്തതയാണ്. കൈയിലുള്ള ചൂടു കാപ്പിയുടെ ഗന്ധം ആസ്വദിച്ച് മൊബൈൽ ഫോണിൽ ഓൺലൈൻ വാർത്തകളിലൂടെ വെറുതെ കണ്ണോടിക്കുകയായിരുന്നു അയാൾ.

പെട്ടെന്നാണ് ആ വാർത്തയിൽ അയാളുടെ വിരലുകൾ ഉടക്കി നിന്നത്. അവിശ്വസനീയതയോടെ ആ തലക്കെട്ട് അയാൾ ഒന്നുകൂടി വായിച്ചു.